Lurta eftir FM1 og Voxpop á netinum

Landsfelag Pensjónista: Løgtingslimir trýstu á skeivan knøtt

Viðmerking til viðgerð lógaruppskoti um mótrokning av fólkapensjónini í samband við arbeiðsinntøku

Landsfelag Pensjónista er sera vónbrotið um 2. viðgerðina, ið løgtingsuppskotið um strikan av mótrokningini við arbeiðsinntøku í pensjónini, fekk undir løgtingsviðgerðini týsdagin 9. mai, og harvið fall burtur.

Einasta orsøkin til, at málið endaði so, sum tað gjørdi, í hvussu er í hesum umfarinum, má vera, at løgtingsmeirilutin má hava misskilt okkurt og tískil hevur trýst á skeiva atkvøðuknøttin. Ella eisini hava hesi somu ikki sett seg nóg væl inn málið.

Virðingin fyri pensjónistum, ið okkara høgtvirda løgting hevur fyri hesum bólki av landsins borgarum í dag í mun til hana, sum annars var stór millum fleiri politisk valevni undan seinasta løgtingsvali, má fyri ein stóran part sigast at verða fokin.

Í sambandi við 2. viðgerðina av løgtingsmálinum um almannapensjónir o.a. hava vit tískil hesar viðmerkingar:

Landsfelag Pensjónista hevur fleiri ferðir gjørt vart við fyrimunir við at avtaka mótrokningina í fólkapensjónini í samband við arbeiðsinntøku.

Tað sýnist sum at politikkarnir gloyma tann stóra mangulin av arbeiðsmegi, ið serstakliga rakar tey eldru. Vit hoyra javnan, at høli standa tóm á røktarheimum, tí har manglar arbeiðsmegi. Hetta merkir eisini, at starvsfólk, ið eru til arbeiðis, hava ikki nóg nógva tíð til búfólkið. Hetta skapar eisini ónøgd hjá starvsfólkunum, ið hava alt ov nógv at gera og tí fara í annað starv. Hetta ger støðuna aftur enn verri innan eldraøkið sum heild, har heimabúgvandi heldur ikki fáa neyðugu hjálpina.

Sagt verður í løgtinginum, at tað koma ikki fleiri pensjónistar á arbeiðsmarknaðin, hóast mótrokningin verður strikað. Hetta er ikki prógvað av myndugleikunum, men vit pensjónistar vita um nógvar, ið fegnir vilja arbeiða meira, um mótrokningin varð strikað.

Les eisini...  Sangur og tónleikur frá Kampingorkestrinum og samrøður við Sakaris "Saggi" Hansen og Ólav Louisson

Eitt annað, ið politikarnir ikki hugsa um, er, at arbeiðslívið gevur nógvum eina betri lívsgóðsku í teirra gerandisdegi og at fleiri byrja at skranta, tá tey ikki arbeiða longur, við tí úrsliti, at brúk verður meira fyri heilsuverkinum, ið síðan fer at kosta meira.

Landsfelag Pensjónista royndi aftaná løgtingsvalið við einum tíðindaskrivi inniliga at minna flokkarnar á, at veruleiki má liggja aftanfyri teirra vallyfti um mótrokning, men tað sær út sum, at hetta vallyftið er gloymt.

Landsfelag Pensjónista vil áhaldandi arbeiða hart fyri, at mótrokningin verður avtikin, tí vit hugsa um tey eldri, ið hava tørv á hjálp, og ikki fáa hjálpina vegna tørvandi arbeiðsmegi.

Argir 10. mai 2023

Beate L. Samuelsen, forkvinna

Landsfelag Pensjónista