Løgtingið hevur í dag við aðru viðgerð samtykt uppskotið hjá formansskapinum í løgtinginum um at broyta heitini fyri løgtingsmenn og landsstýrismenn í tingskipanini.
Meirilutin í grein 25 nevndini, ið varð sett at viðgera uppskotið, mælti í farnu viku til at samtykkja uppskotið, og uppskotið varð í dag samtykt við aðru viðgerð við 26 atkvøðum fyri og sjey ímóti.
Uppskotið hevur í høvuðsheitum við sær, at heitini løgtingsmaður, løgtingskvinna og løgtingsfólk eins og landsstýrismaður, landsstýriskvinna og landsstýrisfólk verða javnsett í lógartekstinum, og at heitini løgkvinna og forkvinna og næstforkvinna verða møgulig at nýta í talu.
Um uppskotið verður samtykt við triðu viðgerð, koma broytingarnar í gildi á ólavsøku.
