Eftir at støðan við Hasfjord er blivin eftirmett, og krevjandi klassakrøv, ið skulu vera uppfylt hálvan juni, eru blivin sett, hevur landsstýrismaðurin, í samráð við Strandferðsluna, gjørt av at leggja Hasfjord í seinnu hálvu av juni mánaða.
Tað skrivar Strandferðslan á heimasíðu sínari.
Samskift hevur verið við ymsar viðkomandi partar í Sandoynni um støðuna, og ynskið er frá millum øðrum vinnulívi í oynni at sigla tveir eykatúrar gerandisdagar.
Strandferðslan arbeiðir tí í løtuni við at gera neyðugar tillagingar í ferðaætlanini, fyri at kunna nøkta flutningstørvin á Sandoyar- og Hestleiðunum, eftir at Hasfjord verður tikin úr sigling, sigur Strandferðslan.
Væntandi tekur Erla Kongsdóttir sær av pørtum av siglingini út í Hest komandi tíðina. Hon siglir annars í løtuni sum eykaskip á Nólsoyarleiðini og fer seinni í summar at avloysa á Kalsoyleiðini, tá ið Sam skal á beding.
Samskift verður í løtuni við Landsverk og Tórshavnar kommunu um at fáa rampurnar í Hesti og á Gomlurætt klárar til, at Erla Kongsdóttir kann flyta akfør um Hestfjørð.
– Farið verður nú undir samráðingar við áhugaðar upphøggarar um at keypa Hasfjord, skrivar Strandferðslan.
