U15-genturnar endaðu á triðja plássi

– Hetta var ein góð og menning kapping. Gamaní taptu vit stórt í síðsta dystinum, men tá royndu vit eisini ymiskt í okkara spælstíli, sum nokk ikki riggaði so væl. Men genturnar tordu at spæla fótbólt, og tær stríddust væl, sigur Sigtór Petersen, venjari hjá U15-landsliðnum við gentum, við heimasíðuna hjá FSF.

Við einum sigri, einum javnleiki og einum tapi, endaðu U15-genturnar á triðja plássi í ársins Baltic Cup 2023, sum júst hevur verið í Litava.

Lettland og Litava endaðu bæði við fimm stigum, Føroyar fingu fýra stig, meðan Estland fekk eitt stig.

Stóri spælarin hjá Føroyum var Sigrið Hansdóttir, ið skoraði fimm av teimum átta málunum, ið føroyska liðið fekk. Kára Sigurðsson skoraði tvey mál, og Sara Benjaminsen gjørdi eitt.

– Vit fara altíð á vøllin fyri at vinna, og tann hugburðin mugu og eiga vit eisini altíð at hava. Líkamikið hvørjum vit møta. Men tá tað er sagt, so er tað ikki altíð tað viktigasta. So sum heild eri eg sera væl nøgdur. Vit høvdu møguleikan at vinna kappingina, men tóku tíverri ikki av, sigur Sigtór Petersen.

Úrslit / Baltic Cup 2023
Føroyar – Litava 3-3
Lettland – Estland 1-1
Føroyar – Estland 5-2
Lettland – Litava 1-1
Føroyar – Lettland 0-5
Litava – Estland 3-1

Næst á skránni hjá U15-gentunum er UEFA menningarkapping, sum verður í Albania frá 25. september til 3. oktober.