Í kvøld verður føroysk fótbóltssøga skrivað, tá KÍ, sum fyrsta føroyska liðið, fer at taka lut í einum dysti í einum evropeiskum bólkaspæli, tá Slovan Bratislava og KÍ bresta saman á Stadium Tehelné pole í slovakiska høvuðsstaðnum.
Tehelné pole-leikvøllurin ella Národný futbalový štadión, sum leikvøllurin eisini verður nevndur, er tjóðarleikvøllurin í Slovakia. Leikvøllurin tekur beint omanfyri 22.000 áskoðarar, og mett verður, at tað verða 12.000 til 14.000 áskoðarar til dystin í kvøld.
Men KÍ verður uttan høvuðsvenjaran, Magna Hoseth, í kvøld. FM1 skilir á lagnum, at Magne Hoseth spýði allan vegin vestur til flogvøllin í gjáramorgunin, og mátti tí venda við. Tað er ikki líkt til, at hann er nóg birgur at ferðast í dag, og er tí eftir í Føroyum.
Hetta hevur við sær, at tað verða hjálparvenjararnir báðir, Daniel Hestad og Sjúrður Jacobsen, sum koma at standa við róðrið til søguliga dystin í kvøld.
Sjúrður kom til KÍ í 2020, og hevur verið hjálparvenjari hjá klaksvíkingum øll hesi árini.
Undan hesum kappingarárinum kom Daniel Hestad, saman við Magne Hoseth, til KÍ, og hevur – eins og Sjúrður Jacobsen – verið hjálparvenjarar hjá Magna Hoseth.
Geza Turi, eldri, er málmansvenjari.
Dysturin millum Slovan Bratislava og KÍ byrjar klokkan 20 í kvøld.
Eingin føroyskur miðil fer at hava frásøgn ella vísa dystin, men dysturin kann millum annað síggjast á TV2 Play, men til tað krevst eitt hald.