92-ára gamil miðlamogulurin Rupert Murdoch hevur boðað frá, at hann gevst nú sum nevndarformaður bæði í Fox og News Corp.
Sambært BBC hevur Murdoch í skrivligari viðmerking til starvsfólkini greitt frá, at tíðin er komin til hansara at átaka sær aðrar leiklutir.
Rupert Murdoch arvaði fyrstu avísina frá pápa sínum í 1952, og fór síðani undir at keypa aðrar avísir í Australia, áðrenn hann eisini fór undir virksemi í Stórabretlandi í 1969, har hann bæði keypti News of the World og The Sun.
Í 1974 fór Murdoch eisini undir virksemi í USA, og síðani hevur hann støðugt voksið um miðlaríkið, sum í dag umfatar bæði Wall Street Journal og sjónvarpsrásina Fox News.
Fox News fór undir at senda í 1996 er mest sædda tíðindarásin í amerikanskum sjónvarpi.
-Okkara feløg eru sunn, og tað eri eg eisini. Møguleikarnir hjá okkum er nógv størri enn avbjóðingarnar, segði Murdoch millum annað í skrivinum til starvsfólkini, har hann eisini gjørdi greitt, at hansara leiklutur skiftir til at vera nevndarformaður emeritus í báðum feløgunum.
Sambært BBC skal Lachlan Murdoch, sum er triðelsta barn og elsti sonur hjá Rupert Murdoch, taka við leiðsluni í báðum feløgunum.
