Allahalgannadag minnast vit tey, ið fingu váta grøv og tey, ið doyðu í yrki sínum á sjónum.
Síðan seinasta allahalgannadag, er eingin føroyingur deyður í yrki sínum á sjónum farna árið.
Siðvenjan at minnast sjólátin er staðfest í tveimum løgtingssamtyktum. Tann fyrra er frá 1943, tann seinna í 1949.
Minningarhaldið allahalgannadag er bæði staðbundið umboðandi tað lokala økið og alment umboðandi allar Føroyar.
Tað staðbundna minningarhaldið tekur atlit at nærumhvørvinum og lagnu fólksins í økinum.
Tað almenna minningarhaldið, sum er til minnis um føroyingar, ið eru deyðir í yrki sínum á sjónum, verður hildið á Vinnuháskúlanum í Havn í dag klokkan 14. Tað er Sjómansmissiónin, ið skipar fyri, har Ann Hermansdóttir, prestur, talar.
Á tí almenna minnigarhaldinum talar Løgmaður. Eftir løtuna á Vinnuháskúlanum, leggur Løgmaður ein krans við minnisvarðan í Viðarlundini í Havn.
Í kvøld verður gudstænasta í Dómkirkjuni klokkan 20, har Heri Joensen, prestur, talar. Gudstænastan fylgir tí almenna minningarhaldinum, skrivar fólkakirkjan á heimasíðu sínari.
