Seinastu tíðina hevur løgreglan gjørt fleiri átøk at kanna ferðsluna við dagstovnar og skúlar, og í gjár var heldur einki undantak.
Hesa ferð var løgreglan og kannaði ferðsluna við skúlar í Klaksvík og við Eysturskúlan í Havn, umframt tveir dagstovnar – Lítlaskóg í Havn og dagstovnin í Sørvági.
Bert tríggjar bøtur vórðu skrivaðar, og tær vórðu skrivaðar í Klaksvík, har ein bilførari fekk bót fyri ikki at sita í trygdarbelti, ein fekk bót fyri ikki at hava bundið barnið hjá sær í trygdarbeltið, og í triðja førinum fekk ein bilførari bót fyri at hava parkerað bilin hjá sær á steðgiplássinum hjá bussinum.
Vaktleiðarin frøist, at so fáar bøtur verða skrivaðar, tá løgreglan ger ferðsluátøk við dagstovnar og skúlar.
– Men hetta kemst allarhelst av, at løgreglan ofta er úti og kannar umstøðurnar, og tað fara vit at halda fram við, sigur vaktleiðarin hjá Føroya Politi.
