Njarðvík og Martin Klein Joensen hava gjørt avtalu um, at partarnir strika sáttmálan við íslendska felagið, sum til dagliga spælir í næstbestu deildini í Íslandi.
Tað boðar íslendska felagið frá á sínum Facebook-vanga.
Boðini vóru enn fesk, tá bolt.fo boðaði frá, at Martin Klein Joensen er á veg aftur til barndómsfelagið, Víking.
Sambært bolt.fo, so skiftir Martin aftur til barndómsfelagið Víking. Har hevur hann skorað nógv mál síðstu árini og var hann nummar fýra á føroyska toppskjúttaralistanum í fjør við 16 málum. Nú legst hann afturat álopsrekkjuni hjá Víkingi, sum frammanundan telur Jørgen Nielsen, Finnur Justinussen og Andreas Lava Olsen.
Eftir góða kappingarárið í fjør gjørdi Martin Klein Joensen tvey ára sáttmála við Njarðvík í oktober í fjør, men steðgurin gjørdist stuttur í íslendskum fótbólti, har hann skoraði tvey mál í tveimum dystum í íslendsku steypakappingini, Lengjubikarnum.
Njarðvík takkar Martini fyri tíðina og ynskir honum alt tað besta í framtíðini.
Víkingur spælir leygardagin í Sørvági móti 07 Vestur.