Gestur í ár er Hans-Ole Bækgaard, sum er formaður fyri Indre Mission í Danmark. Hann er virkin í almenna kjakinum í Danmark, har hann íðin verjir rættin til eina kristna lívsáskoðan í einum postmodernaðum samfelag. Hans-Ole hevur áður starvast sum prestur bæði í Danmark og Ísrael.
– Heimamissiónin vil fevna um menniskju frá vøggu til grøv. Allir aldursbólkar eru vælkomnir, og tað er gott við tiltøkum og tilboðum til hvørt ættarlið og lívsstøðu. Men vit hava eisini tørv á hvørjum øðrum – menniskjaliga og andaliga. Hvønn týdning hava savningarmegi og felagsskapur í missiónsarbeiðinum? Hetta eru spurningar, sum Bækgaard nemur við til fyrsta fyrilesturin, “Tvørtur um ættarlið: um savningarmegi og felagsskap”, skrivar Heimamissiónin.
Seinni kemur hann at tosa um, hvat tað frá einum bíbilskum sjónarhorni merkir at vera lýðin.
Eisini verða frágreiðingar um arbeiðið frá formanninum, Hera Kjærbo, og aðalskrivaranum, Jákup Brúsá, umframt fíggjarfrágreiðing frá Spekt. Møguleiki verður eisini at seta spurningar og gera viðmerkingar.
Møti og ungdómsmøti um kvøldið
Ársmøtið endar við einum møti klokkan 19 um kvøldið og einum ungdómsmøti klokkan 21:30.
– Til fyrra møti verður fokus sett á evnið ‘Trúføst kristin í almenna rúminum’, har Bækgaard kemur at tosa um, hvussu kristin kunnu vera trúverdig vitnir í ymsum lívsstøðum. Her vil hann serliga greiða frá, hvussu vit kunnu bjóðast av ella kveikjast av umstøðunum, soleiðis sum Jeremia profetur upplivdi tað. Til møtið kemur Anna Lovisa Mýri at framføra, umframt at bøn verður fyri nýggjastu starvsfólkunum hjá Heimamissiónini, skrivar Heimamissiónin.
Dagurin endar við ungdómsmøti, har eitt nú Sólbjørg Símunarson luttekur. Hon var ein av undangongukvinnunum fyri Heimamissións Ungdóm (HMU), og landsungdómsnevndin hevur bjóða henni at fortelja eitt sindur um, hvussu ungdómsarbeiðið byrjaði.
Nýggi ungdómsráðgevin, Kartin Høgnesen, talar til ungdómsmøti, umframt at lovsangur eisini verður.
Skráin fyri Ársmøtið sæst á www.mission.fo.
