Klokkan 16:45 í dag fer føroyska kvinnulandsliðið aftur á vøllin. Hesaferð er tað Grikkaland, ið stendur á mótstøðuhálvuni á Tórsvølli.
Undan dystinum hevur landsliðsvenjarin, Signe Pries Andersen gjørt tvær broytingar í byrjunaruppstillingini, í mun til tær fyrstu ellivu, ið vórður sendar á vøllin frá byrjan farna fríggjadag, tá Føroyar vunnu 4-0 á Andorra.
Hesa ferð fær Eyðgerð Mikkelsen møguleikan í málinum, og verjuna manna Tórunn Joensen, Birita Ryan og Sara Samson Lamhauge. Á miðvøllinum vera Ásla Johannesen, ið eisini er liðskipari, Rúna Jacobsen, Sunniva Willemoes og Jensa Tórolvsdóttir. Framrættaðir miðvallarar vera Eyðvør Klakstein og Durita Hummeland, og í álopinum verður Heidi Sevdal.
Á bonkinum sita Valborg Østerø, Rebekka Benbakoura, Julia Naomi Mortensen, Tóra Mohr, Lea Lisberg, Sanna Svarvadal, Mona Rasmusdóttir, Petra Hoydal, Fridrikka Clementsen.
Til dystin í dag verður ókeypis atgongd fyri børn, 14 ár og yngri. Atgongumerki til vaksin, sum er 95 krónur, fáast til keyps í nethandilinum á heimasíðuni hjá FSF, ella á atgongumerki.fo.
FSF bjóðar undir dystinum ókeypis kaffi og køku til allar áskoðararnar.
Kelda: Hans Erik Danielsen/FSF