– Í 2023 hevði Vónin-samtakið eina søluframgongd upp á 34 milliónir krónur – frá 603 milliónir krónur í 2022 til 637 mió. kr. í 2023. Vøksturin kemst av øktari sølu til marknaðir uttanfyri Føroyar, sigur Vónin í tíðindaskrivi.
Vónin sigur, at sølan til alivinnuna er vaksin síðstu árini, har hon er vorðin meira enn ein triðingur av samlaðu søluni hjá samtakinum.
Hóast samtakið upplivdi ein vøkstur í søluni, so fall úrslitið hjá samtakinum frá 52 milliónum krónum. í 2022 til 47 milliónir krónur í fjør.
– Høvuðsorsøkirnar til broytingina vóru øktar lønarútreiðslur, umframt hægri avskrivingar og øktar rentuútreiðslur vegna íløgur í bygningar og rakstrartól.
Í fjør starvaðust 454 fólk í samtakinum – harav starvaðust 103 av teimum í Føroyum.
Samtakið fevnir um feløg í Føroyum, Grønlandi, Skottlandi, Kanada, Danmark, Norra og Litava.
Í Føroyum hevur Vónin tríggjar deildir. Ein deild við Norðskála til alivinnuna, ein deild í Fuglafirði til uppsjóvarvinnuna og ein deild í Havn til botn- og rækjutrolsvinnuna.
Í samtakinum eru 22 deildir staðsettar runt Norðuratlantshavið.