Starvsnevndin hjá NSÍ hevur í dag móttikið eitt uppsagnarskriv frá ítróttarstjóra felagsins, og felagið gongur ynskinum á møti.
Skrivið er soljóðandi:
“Góða starvsnevnd
Eg skrivi í sambandi við nógv umtalaðu hendingina til landskappingardystin millum NSÍ og KÍ fríggjakvøldið 28. juni 2024.
Í kunningarskrivinum frá starvsnevndini á heimasíðu felagsins 2. juli 2024 skrivar nevndin, at felagið tekur staðiliga frástøðu frá hesi hending. Víðari verður skrivað, at slík hending má og skal ikki koma fyri, og at nevndin vil gera sítt fyri, at so er.
Eg harmist sera nógv um hendingina, og vil við hesum biðja um umbering til starvsnevndina, felagið, vaktirnar, leikararnar, dómararnar, FSF og øll viðhaldsfólkini hjá NSÍ. Eg taki undir við almenna skrivinum hjá starsvnevndini, og eg taki tað til eftirtektar. Slíkur atburður hoyrir ikki heima á fótbóltsvøllinum. Eg traðkaði veruliga við síðunar av. Hatta var ikki í lagi.
Sum avleiðing av hesi hending steðgi eg sum ítróttarstjóri hjá NSÍ. Eg ynski í hesum sambandi at verða leysgivin fyri allar uppgávur fyri felagið pr. dags dato.
At enda vil eg gjarna takka fyri øll árini í NSÍ – bæði sum leikari, nevndarlimur og ítróttarstjóri.
Vinaliga,
Eyðstein Skipanes“
