Í samband við, at Hanus Joensen nú fer frá sum ráðgevi í Undirvísingarstýrinum, so var ein lítil fráfaringarløta hildin í dag.
Stjórin á Undirvísingarstýrinum, Hjalmar Hansen, handaði Hanusi eina gávu og bar fram eina heilsan, har hann millum annað nevndi hetta:
”Góði Hanus, Tú hevur nú í 50 ár tænt føroyska fólkaskúlanum. Sum vanligur lærari, sum skúlastjóri og sum ráðgevi. Tú hevur hesi árini upplivað og verið við til at myndað stórar broytingar í fólkaskúlaskipanini. Tað, at hava ein góðan skúla, trúgvi eg, hevur øll hesi 50 árini, staðið fremst í tínum huga. Tú ert framskygdur og sært heldur møguleikar enn forðingar, og smæðist ikki við at eggja okkum øllum til at seta okkum høg mál.”
Starvsfelagarnir á Undirvísingarstýrinum takkaðu Hanusi fyri tíðina og ynsktu honum blíðan byr fram yvir.
Mong munnu kenna Hanus frá hansara tíð innan fólkaskúlan. Hanus var millum annað í mong ár skúlastjóri, fyrst í Tórshavnar kommunuskúla og síðan samanlagda Skúlanum á Fløtum.
Hanus er eisini kendur fyri so mangt annað. Millum annað sum hondbóltspælari, telvari, kórleiðari og urguspælari. Hanus hevur síðan 2017 starvast sum ráðgevi í Undirvísingarstýrinum innan fólkaskúlaøkið.
