Frá Vestri til 07 Vestur.
07 Vestur kunnger, at felagið hevur gjørt sáttmála við fyrrverandi NSÍ-spælaran Mikkel Jakobsen.
Hann hevur ikki havt sáttmála við nakað lið seinasta hálva árið, men spældi áðrenn tað við íslendska liðnum Vestri.
Mikkel Jakobsen er kent andlit í Føroyum. Hann spældi við NSÍ kappingarárið 2021. Hann fór tá til Íslands at spæla fótbólt. Hann hevur spælt við Leiknir og Vestri í Íslandi.
Leiknir fekk í 2022 tríggjar spælarar í sín hóp, ið høvdu spælt í Føroyum, men tað gekk ikki eftir vild, tí Leiknir flutti niður hetta kappingarárið.
Mikkel Jakobsen byrjaði sína yrkisleið, tá ið hann fekk sáttmála við akademiið hjá FC Midtjylland. Har var hann, til hann skifti til Ringkøbing IF í 2020. Hann hevur eisini spælt við Kolding IF.
Mikkel er offensivur miðvallari, sum fyri tað mesta hevur spælt vinstrumegin á miðjuni.
Hann hevur spælt 62 dystir í næst- og triðbestu deildini í Danmark, 42 dystir í bestu og næstbestu deildini í Íslandi og 26 dysti í Betri- deildini í Føroyum, og hevur eisini umboðað U16-liðið hjá Danmark.
– Vit ynskja Mikkel hjartaliga vælkomnum til 07 Vestur, skrivar felagsliðið í Vágum.
