Løgmaður vísti greitt á, at vit hava valt ES og NATO til á uttanríkispolitiska økinum
Tá ið støðan er so spent sum hon er í heiminum í dag, so mugu vit hugsa um hvørji tekin vit senda úr Føroyum og út í heim – hvat vit siga og hvønn vit samstarva við.
Tað kann fáa avgerandi týdning.
-Tí skrivaðu vit undir semjuskjal við ES, tá ið Ursula von Der Leyen vitjaði í vár – og tí vilja vit endurnýggja avtalurnar við ES.
-Tí hava vit gjørt semjuskjal við USA, og tí letur sendistovan í Washington loksins upp í heyst.
-Tí vilja vit styrkja handilssamstarvið við Bretland, Japan, Brasil, Kina, India og Suðurkorea. Tí hava vit minkað samstarv okkara við Russland.
-Tí vilja vit í nógv størri mun umboða okkara egnu áhugamál úti í heimi, segði løgmaður.
Hóast samstarvið við donsku stjórnina er gott, er breið semja í Tinginum um, at vit mugu víðka uttanríkispolitiska virkisførið, legði hann afturat.
-Allir flokkar halda, at Føroyar eiga at hava sjálvstøðugan limaskap í viðkomandi altjóða felags skapum. Eitt nú heimshandilsstovninum WTO og í fiskivinnufelagsskapunum NEAFC og NAFO.
-Nú eru vit eisini farin at missa tolið við Norðurlandaráðnum. Í hálva øld hava vit roynt at fáa fullgildan limaskap – til fánýtis.
-Eftir ólavsøku fari eg at kalla forfólkini í øllum flokkum inn, so breið semja kann fáast um, hvussu vit víðka rásarúmið á uttanríkispolitiska økinum.
-Her krevst, at vit lata ósemjurnar um loysing/samband liggja og savna okkum um tað, vit eru samd um. Annars koma vit ikki úr stað, segði Aksel V. Johannesen, løgmaður.
