Innflutningsvirðið í tíðarskeiðinum frá novembur 2023 til oktobur 2024 er sambært Hagstovu Føroya minkað við 1,5 milliardum krónum, sum er ein minking á 13 prosent samanborið við undanfarna skeið. Samlaða virðið á innflutninginum var 10,1 milliard krónur
Minkingin í innflutninginum stavar í høvuðsheitum frá lægri innflutningsvirði á brennievni og skipum. Innflutningurin av brennievni og øðrum oljum er minkaður við 374 milliónum krónum, orsakað av lægri prísum.
Innflutningurin av maskinum, motorum, skipum og akførum er minkaður við einari góðari milliard krónum, ella 30 prosent. Innflutningurin av akførum er minkaður við 123 milliónum krónum, ella knapt 20 prosent.
Verður hugt eftir, hvussu innflutningurin er skiftur á nýtsluendamál, sæst, at innflutningurin til endaliga nýtslu er minkaður við 554 milliónum krónum, ella 13 prosent.
Innflutningurin til nýtslu í framleiðsluni er minkaður við 84 milliónum krónum, ella 1,7 prosent. Minkingin í fastum bruttoíløgum stavar serstakliga frá færri innfluttum skipum.
Verður hugt at, hvar innflutningurin kemur frá, sæst at innflutningurin úr ES minkaður við 1,2 milliardum krónum, ella nærum 19 prosent, meðan innflutningurin úr Evropa annars er vaksin við 664 milliónum krónum, ella 35 prosent.
Innflutningurin úr Norðuramerika er minkaður við 139 milliónum krónum, ella 44,8 prosent, meðan innflutningurin úr Asia hevur ligið á sama støði nógvu tey seinastu árini.
Deil á Facebook
