Parkering og bussar í sambandi við at tunlar norður um Fjall lata upp

Landsverk væntar nógvarferðslu, tá ið tunlarnir norður um Fjall lata upp hósmorgunin. Tí er er Landsverk komið við kunning, um hvussu ferðsla, parkering og bussar verða skipað hendan hátíðardagin.

Serbussar í sambandi við flutning úr Hvannasundi/Norðdepli til renning/gongd frá Ánunum
Tríggir bussar koyra frá Hvannasundi til Ánirnar (so fólk frá Viðareiði/Hvannasundi kunnu luttaka í gongd/renning uttan at taka bil suður um). Bussarnir koyra klokkan 11.10 umvegis busssteðgiplássini báðumegin byrgingina í Hvannasundi/Norðdepli.

Serbussar í sambandi við hátíðarhaldið
Frá klokkan 12.30 til umleið klokkan 13.20 koyra tveir bussar pendulfart til/frá bussisteðgiplássunum báðumegin byrgingina í Hvannasundi/Norðdepli og koyra til nýggja tunnilsmunnan Hvannasundsmegin (við Toftá). Somuleiðis beint eftir hátíðarhaldið umleið klokkan 14.10 koyra bussar aftur pendulfart og seta fólk av við busssteðgiplássini báðumegin byrgingina í Hvannasundi/Norðdepli. Bussarnir koyra til umleið klokkan 15.00.

Serbussar í sambandi við renning/gongd – flutningur aftur til Klaksvíkar
Í sambandi við renning/gongd koma tveir bussar at standa við tunnilsmunnan Hvannasundsmegin og koyra umleið klokkan 14.10 til Klaksvíkar og seta fólk av við busssteðgiplássið við Biskupstorg.

Parkering av bilum í sambandi við hátíðarhaldið
Væntandi vera nógvir bilar til renning/gongd/súkkling og hátíðarhaldið og tí er týðandi, at bilar vera parkeraðir á støðini, ið síggjast á hesum myndunum og annars taka neyðug fyrilit til ferðslutrygdina. Landsverk vil ráða fólki til mest møguligt at brúka busssambandið frá Hvannasundi/Norðdepli.

Ferðsla í gomlu tunlunum – einvegis ferðsla norðureftir frá klokkan 12.22
Klokkan 12.15 er seinasta umfar/møguleiki fyri at koyra suður gjøgnum gomlu tunlarnar frá Hvannasundi og Árnafirði.

Frá klokkan 12.22 er bert møguleiki at koyra einvegis norðureftir frá Ánunum og Árnafirði gjøgnum gomlu tunlarnar.

Klokkan 13.15 er seinasta umfar/møguleiki fyri ferðslu norðureftir gjøgnum gomlu tunlarnar frá Ánunum og Árnafirði og hareftir vera tunlarnir stongdir.

Opið fyri almennari ferðslu í nýggju tunlunum
Umleið klokkan 14.10 verður latið upp fyri almennari ferðslu frá tunnilsmunnanum Hvannasundsmegin.
Umleið klokkan 14.20 verður latið upp fyri almennari ferðslu frá tunnilsmunnunum í Árnafirði og í Ánunum.

Landsverk heitr á bilførarar at sýna stórt varsemi og tol í sambandi við tiltakið.