Tann 11. juni 1990 hevði enski Gary Lineker tvær minniligar løtur undir HM, tá hann skoraði eitt mál ímóti Írlandi og ikki fekk bilbugt við búkilsku.
Framman fyri 35.238 áskoðarum á leikvøllinum hjá Cagliari, Stadio Sant’Elia, møttust Ongland og Írland í fyrsta dystinum í bólkaspælinum. Lineker, sum endaði fyrsta kappingarárið við Tottenham Hotspur sum toppskjútti í bestu deildini, legði Ongland á odda 1-0 í 8. minutti. Chris Waddle sendi eina langa sending inn í brotsteigin, har Lineker rann inn í bóltin og bringaði hann fram við írska málverjanum, sum lá endilangur. Bólturin sprakk upp um beinið hjá málverjanum og rullaði móti málinum. Í harðari kapprenning við tveir írskar verjuleikarar fekk Lineker skreiðað bóltin í málið.
Írski miðvallarleikarin, Kevin Sheedy, javnaði í 72. minutti og dysturin endaði 1-1. Bæði liðini komu víðari úr bólkinum, men Írland tapti fyri Italia í fjórðingsfinaluni, meðan Ongland mátti lúta fyri Vesturtýsklandi í hálvfinaluni.
Tá skrivaðu bløðini, at Lineker stríddist við búkilsku undir dystinum, men 20 ár seinni greiddi Lineker frá allari líðingini – meðan hann royndi at takkla, kukkaði hann í buksurnar. Upptøkur frá dystinum vísa, at Lineker akar rumpuna og turkar hendurnar í grasinum. Tá hann seinni greiddi frá hendingini, helt hann fyri, at “hann hevði ongantíð hevði havt so gott pláss á vøllinum.”
