Av teimum 55 londunum, ið eru limir í evropeisku fótbóltssamgonguni, UEFA, eru sjey lond, ið Føroyar framvegis ikki hava møtt í A-landsliðshøpi hjá monnum. Talan er um Ongland, Kroatia, Bulgaria, Belarus, Armenia, Albania og Montenegro.
Men í kvøld, týskvøldið klokkan 19:45, verður eitt av hasum liðunum strikað av listanum. Fyri fyrstu ferð síðan 1990, tá Føroyar fóru undir at luttaka í EM- og HM-undankappingum, eru Føroyar og Albania komin í sama bólk.
Eins og Føroyar, fóru albanar eisini undir sína fyrstu undankapping í 1990, og síðan hava teir meir ella minni stútt og støðugt otað seg longri og longri upp eftir styrkislistanum hjá FIFA. Í 2015 náddu teir hægsta tindin higartil, tá Albania var nummar 22 av teimum 211 londum á FIFA-listanum.
Seinastu átta árini er landsliðið hjá albanum tó farið eitt vet aftur, og á seinast dagførda styrkislista, er Albania nummar 68 í heiminum. Føroyar eru á 125. plássi.
Hóast albanska liðið er mannað við framúr dugnaligum fótbóltsspælarum, so eru størstu stjørnurnar í hópinum allarhelst venjarin, brasiliumaðurin Sylvio Mendes Campos Júnior, ella betri kendur sum Sylvinho, og ein av hjálparvenjarunum, Pablo Zabaleta úr Argentina, sum í nógv ár var sáttmálabundin við Manchester City.
Í síni tíð sum virkin spælari fekk Sylvinho seks A-landsdystir fyri Brasil, og kendastu felagsliðini, ið hann spældi fyri, vóru Arsenal, Manchester City og FC Barcelona, har tað eydnaðis honum millum annað at vinna Champions League.
Til stuttleika kann nevnast, at Zabaleta var á høgra bakki, tá føroyski málverjin, Gunnar Nielsen varð sendur á vøllin fyri Manchester City í Premier League tann 24. apríl í 2010, tá hann bleiv skiftur inn í 76. minuttir fyri skadda Shay Given.
Atgongumerki fáast til keyps í Nethandilinum á heimasíðuni hjá Fótbóltssambandi Føroya, www.FSF.fo. Mánakvøldið vóru gott 2.100 atgongumerki seld.
EM-undankappingardysturin millum Føroyar og Albania byrjar klokkan 19:45.
Hóast tíðin í Manchester City ikki gjørdist drúgv fyri Sylvinho, so mintist hann væl Gunnar Nielsen (Mynd: Hans Erik Danielsen/fsf.fo)
Kelda: Hans Erik Danielsen/fsf.fo
