Í løtuni verður seinasta hond løgd á fyrireikingarnar til ársins Voxbotn, og arbeiðið hevur higartil gingið væl.
-Vit eru við at vera har, sigur Rúni Djurhuus, sum er ein av fyriskiparunum handan festivalin, sum aftur í ár telur tveir dagar, heldur enn bert ein, sum vanligt var áðrenn koronu.
Pallarnir og allar aðrar tekniskar installatiónir eru við at koma upp á pláss, og tá FM1 fekk fatur á Rúna Djurhuus, vóru seinastu tónleikarar á veg til Føroya við Atlantic Airways.
Tað eru ikki hissini fyrireikingar, ið skulu til fyri at halda tílíkt tiltak í miðbýnum, og Rúni Djurhuus metir, at millum 200 og 300 fólk eru knýtt at tiltakinum, sum verður í dag og í morgin.
Dyrnar til Voxbotn lata upp klokkan 18 í kvøld, og tað eru framvegis atgongumerki til sølu á ebillett.fo, sigur Rúni Djurhuus.