Hóast nøgdin av fiskayngli á landgrunnin var ymisk fyri tey ymisku fiskasløgini, so var nøgdin av fiskayngli yvirhøvur yvir miðal samanborið við onnur ár.
Tað vísa úrslitini frá kanningunum, nú Jákup Sverri júst er afturkomin av yngul- og ætikanningum, sum vórðu gjørdar á Landgrunninum og Føroyabanka í juni.
Havstovan sigur, at nøgdin av toskayngli var yvir miðal, fyri hýsu var tað størsta talið nakrantíð, fyri nebbasild um miðal og fyri hvítingsbróður undir miðal.
Støddin á ynglinum var áleið tann sama sum í fjør, tó undir miðal fyri øll fiskasløgini, um hugt verður eftir tíðarskeiðnum frá 1983 til 2001.
Vanliga er nøgdin av fiskayngli á Føroyabanka nógv minni enn á Landgrunninum. Nøgdin av toskayngli var av teimum størstu í mun til onnur ár, meðan nøgdin av hýsuyngli og nebbasildayngli var undir miðal. Støddin á ynglinum var undir miðal fyri bæði tosk, hýsu og nebbasild.
Nógv ymisk fiskayngul vóru fyri fyrstu ferð skrásett á hesum túrinum, harímillum makrelyngul, gestfiskayngul og havállayngul, har øll vóru fingin á Føroyabanka og vestanfyri á Landgunninum, tó uttan fyri sjóvarfalsfrontin.
Nøgdirar av plantuæti á Landgrunninum vóru um miðal. Mest var norðanfyri og í landnyrðingspartinum. Samlaði gróðurin av plantuæti á Landgrunninum higartil í ár var stutt yvir miðal. Sum heild var lítið av djóraæti inni á Landgrunninum. Meira var í syðra parti og enn norðanfyri. Samstundis var mest av yngli norðanfyri og sannlíkt er, at yngulin hevur etið so mikið av djórætinum har, at nøgdin er minkað. Vit plaga at síggja eitt øvugt samband ímillum nøgdir av æti og yngli hesa árstíðina. Á Føroyabanka var sera lítið av djóraæti.
