Tað eru bara 52 umsóknir til læraraútbúgvingina í ár.
Saman við í 2019, so er hetta lægsta tal av umsóknum, sum hevur verið, síðan læraraútbúgvingina varð løgd um til eina bachelorútbúgving á Námsvísindadeildini í 2008.
Hóast talið av umsóknum var lágt í 2019, tá bara 52 umsóknir vóru, so vóru tað í 2020 fleiri umsøkjarar.
Skúlablaðið skrivar, at gongdin frá 2020 til 2022 hevur tó verið, at talið av umsóknum er minni ár fyri ár, tí hevur Lærarafelagið bíðað spent eftir tølunum í ár.
– Hendan gongdin, at talið av umsóknum er minni ár fyri ár, er ikki haldbar, tí mugu viðkomandi partar hyggja at, hvat vit kunnu gera til komandi ár. Vit kunnu ikki bara lata standa til, skrivar Lærarafelagið á heimasíðuni hjá Skúlablaðnum.
– Vit hava ikki fleiri ung í Føroyum, sum ynskja at útbúgva seg, enn tað sama. Nú talið á útbúgvingum á Setrinum er vaksið, tað verða tiknir tveir flokkar inn til sjúkrarøkt og námsfrøðing, og tað er hákonjunkturur í samfelagnum, so at arbeiði og lærupláss eru mong at velja í, so var spennandi at síggja, hvat fór at henda við talinum á umsóknum til læraraútbúgvingina. Tað er eisini vert at hava í huga, at vit hava havt stóran prísvøkstur í samfelagnum, so at nøkur, sum hava dreymar um at útbúgva seg, eru setst aftur, tí at ráðini eru ikki til at liva av studningi í løtuni, skrivar felagið.
Í miðal hava tað verið umleið 75 umsóknir í læraraútbúgvingina árini frá 2008 til 2023, og tað árið, tað vóru flestar umsóknir, var í 2016, tá vóru 91 umsóknir til læraraútbúgvingina.
Í alt 389 umsóknir komu inn til lestur á Setrinum í 2023. 340 av teimum tilsamans 389 umsóknunum um lestrarpláss í 2023 eru til tær 13 bachelorútbúgvingarnar, sum vórðu bodnar út í ár, skrivar Skúlablaðið.
Ár Umsóknir til læraraútbúgvingina
2008 76
2009 71
2010 83
2011 81
2012 87
2013 83
2014 68
2015 86
2016 91
2017 68
2018 73
2019 52
2020 84
2021 75
2022 64
2023 52
Kelda: Skúlablaðið
