Tað eru stúrandi hagtøl fyri føroyska A-landsliðið við monnum undan landsdystinum móti Kekkia.
Meðan Kekkia stríðist fyri at vinna eitt pláss til EM-endaspælið í Týsklandi komandi summar, so stríðist føroyska landsliðið enn við at fáa fyrsta sigurin í okkara bólki – í bólki E í undankappingini til EM í 2024 – og skal mann hava stig, so skulu mál skorast, og satt at hevur ikki verið høvið at feira eitt føroyskt mál í øllum 2023, tí vit hava bara skorað tvey – eitt mál í javnleikinum úti móti Moldova, og eitt mál í 3-1 ósigrinum móti Albania heima.
Men verður hugt eftir, hvussu nógv skot, ið føroyska liðið hevur havt innan málrammuna í øllum landsdystinum, sum eru spældir í 2023, so hava vit bara havt fimm skot innanfyri málrammuna í sjey landsdystum, sum hava verið spældir í 2023. Tá er venjingardysturin úti móti Norðurmakedónia taldur við.
Her er eitt yvirlit yvir A-landsdystir í 2023:
Moldova – Føroyar 1-1
Norðurmakedónia – Føroyar (venjingardystur) 1-0
Føroyar – Kekkia 0-3
Føroyar – Albania 1-3
Pólland – Føroyar 2-0
Føroyar – Moldova 0-1
Føroyar – Pólland 0-2
Føroyar – Albania á Tórsvølli týsdagin 20. juni 2023. Standandi f.v.: Teitur Matras Gestsson, Gunnar Vatnhamar, Odmar Færø, Heini Vatnsdal, Jóan Símun Edmundsson og Viljormur Davidsen. Húkandi f.v.: Jákup Biskopstø Andreasen, Klæmint Andrasson Olsen, René Shaki Joensen, Sølvi Vatnhamar og Hanus Sørensen (Mynd: Hans Erik Danielsen/fsf.fo)