Felagið Føroyskir Sjúkrarøktarfrøðingar gjørdi skjótt av, tá landsstýrið legði fram uppskot um at leggja upp í verkfallið hjá sjúkrarøktarfrøðingunum.
Allir sjúkrarøktarfrøðingar, sum eru fevndir av sáttmálanum millum felagið og Fíggjarmálaráðið, fara nú í verkfall alt fyri eitt, stendur at lesa í skrivi frá Felagnum Føroyskir Sjúkrarøktarafrøðingar.
Skrivið er soljóðandi:
“Nú Løgtingið leggur upp í ósemjuna millum Felagið Føroyskir Sjúkrarøktarfrøðingar og Fíggjarmálaráðið og harvið brýtur avtaluna frá 1. juli 2014 millum Fíggjarmálaráðið og Felagið Føroyskir Sjúkrarøktarfrøðingar um fráboðanarform og fráboðanarfreist undan arbeiðssteðgi, verður hervið boðað frá arbeiðssteðgi fyri allar sjúkrarøktarfrøðingar og allar sjúkrarøktarfrøðiligar leiðslur, ið starvast eftir sáttmála millum Felagið Føroyskir Sjúkrarøktarfrøðingar og Fíggjarmálaráðið á hesum støðum:
Sjúkrahúsverk Føroya
Heilsutrygd
Gigni
Almannaverkið,
Hvíldarheimið Naina
Blákross
Heilbrigdið
Herbergið
Fróðskaparsetur Føroya
Heilsuskúli Føroya
Sjúkrarøktarfrøðingar, ið arbeiða eftir sáttamála millum Felagið Føroyskir Sjúkrarøktarfrøðingar og KAF eru ikki umfataðir av hesari fráboðan.
Arbeiðssteðgurin er galdandi frá tí løtu, uppskotið verður borið niðan í Løgtingið.
Allir limir felagsins verða biðnir at gera seg liðnan við uppgávuna, tær standa við og fara síðani heim at bíða eftir nærri boðum.
Vegna
Felagið Føroyskar Sjúkrarøktarfrøðingar
Óluva í Gong, forkvinna“
