Enn ein morgun, har tað er sera hált kring landið.
Vaktleiðarin hjá Føroya Politi greiðir frá í morgun, at løgreglan hevur fingið nógvar fráboðanir um hálku, serliga í Eysturoynni.
– Bilførarar vera bidnir um at ansa sær í ferðsluni, hóast landsvegirnir nú eru saltaðir, sigur vaktleiðarin.
Ein lastbil hjá Posta gleið í nátt á mótkoyrandi farbreyt um Gøtueiði, og endaði úti í bilverjuni har, og slapp hvørki aftur ella fram.
So hevur eisini eitt hálkuóhapp verið í Funningsfirði, har ein bilur er gliðin av vegnum í bygdini.
– Ein sjúkrabilur og ein politibilur kom á staðið. Bilførarin fór til nærri kanningar á Landssjúkrahúsinum, men tað var ikki nakað alvorligt, sigur vaktleiðarin.
Bæði akførini, sum eru gliðin í hálkuni, mugu hava hjálp til at koma av staðnum.
Landsverk boðar frá hálku í Sandoy, við Velbastaðháls og í Kaldbaksbotni, meðan løgreglan sigur, at tað enn er sera hált í støðum, serliga í norðara parti í Eysturoynni.