– Vónandi enda vit ikki í bólki saman við Rumenia, Slovakia og Belarus. Hinvegin, so hevði tað verið fínt um vit komu í bólk saman við Svøríki, Kýpros og Litava ella Gibraltar.
Tað sigur Viljormur Davidsen, varaliðskipari á A-landsliðnum, við heimasíðuna hjá FSF.
Í dag klokkan 17 verður avgjørt, hvørjum londum føroyska manslandsliðið skal møta í komandi Nations League kapping. Føroyar eru í styrkisbólki 2 í deild C, har tey 16 londini eru býtt í fýra styrkisbólkar.
Í styrkisbólki 1 eru Rumenia, Svøríki, Armenia og Luksemborg.
Í styrkisbólki 2 eru Føroyar, Aserbadjan, Kosovo og Bulgaria.
Í styrkisbólki 3 eru Norðurmakedónia, Slovakia, Norðurírland og Kýpros.
Í stýrkisbólki 4 eru Hvítarussland, Litava ella Gibraltar, Estland og Lettland.
Lutakastið verður skipað á tann hátt, at Føroyar koma í bólk saman við einum av londunum í styrkisbólkunum 1, 3 og 4.
– Næstan líka mikið hvørjum vit koma í bólk saman við, so verður talan um sterka mótstøðu. Men tá tað er sagt, so kunnu vit eisini bíta frá okkum, og tað ætla vit okkum sjálvandi at gera, sigur Viljormur Davidsen.
Dystirnir í UEFA Nations League 2024/2025 verða spældir í tíðarskeiðunum 5. til 10. september, 10. til 15. oktober, og 14. til 19. november í ár.
Kelda: Hans Erik Danielsen/fsf.fo
