Emma Lind Simonsen fer at spæla við B36 í ár.
Hon er 20 ára gomul, og er uppvaksin í Aab. Í 2022/23 læs hon í USA, og spældi tá við liðnum á skúlanum. Síðani vendi hon heim aftur til Aab.
Emma royndarvandi við B36 í januar, og felagið ivaðist ikki eina løtu í, at B36 vildi hava Emmu at spæla fyri tey svørt/hvítu í Havn.
Hon hevur spælt nógv í miðverjuni, men kann spæla á fleiri plássum.
– Eg helt tað vera ein góður møguleiki at fáa nógva spælitíð og eisini nakrar góðar upplivingar. Eg kendi meg væl í felagnum og millum fólkini her, tá eg vitjaði B36 eitt vikuskifti í januar. Tí valdi eg, at taka av møguleikanum, sigur Emma Lind Simonsen við heimasíðuna hjá B36.
