Krabbameinsfelagið sigur, at endamálið við at savna fólk, ið øll hava mist makan, er at geva tí einstaka møguleika at seta orð á og viðgera tær kenslur, tankar og trupulleikar, sum missurin av makanum gevur og hevur.
Nýggjur samrøðubólkur byrjar tann 9. apríl.
– Ígjøgnum samtalurnar við onnur í somu støðu, fáa styrki til at koma eitt fet víðari í lívinum. Samtalurnar eru sjálvandi í trúnaði, skrivar Krabbameinsfelagið á heimasíðu sínari.
Til at skipa fyri og leiða bólkarnar, so eru sjúkrarøktarfrøðingar hjá Krabbameinsfelagnum, ið hava terapeutiska eftirútbúgving og hava drúgvar royndir við at arbeiða við fólki, sum eru í sorg og kreppu.
– Hevur hetta tín áhuga kanst tú ringja og fáa nærri at vita, á telefon 317959 ella senda okkum ein teldupost á kmf@krabbamein.fo.
Bólkurin kemur saman fyrstu ferð týsdagin 9. apríl, og møtt verður í hølunum hjá Krabbameinsfelagnum, ið heldur til á Grønlandsvegnum 58 í Havn.
– Ætlanin er, at bólkurin er samlaður 14 hvønn dag og í alt sjey ferðir, skrivar Krabbameinsfelagið.