Leygardagin 2. mars verður norðurlandameistarakapping í innirógving.
Tað skrivar Róðrarsamband Føroya á heimasíðu sínari.
Kappingin, sum kallast Nordic Indoor Championship, verður skipað upp á skift av limalondunum í Nordic Rowing, og í ár er tað danska róðrarsambandið, sum stendur fyri kappingini.
Hini limalondini í Nordic Rowing eru Finland, Svøríki, Noregi og Ísland.
Síðan koronafarsóttin gjørdi um seg kring heimin, so hevur kappingin verið skipað netborið/virtuelt, og soleiðis verður tað eisini hesa ferð.
– Tað ber við sær, at luttakararnir sjálvir standi fyri tilmeldingini og kunnu kappast har tey ynskja. Føroysku luttakararnir hava tó sligið seg saman, og kappast í felag fýra støð í landinum, í Vági, á Tvøroyri, í Sandavági og við Gøtugjógv, skrivar Róðrarsamband Føroya.
– Róðrarsambandið er við í fimleikahøllini í skúlanum við Gøtugjógv, har vit stroyma beinleiðis á YouTube vanganum hjá Róðrarsamband Føroya, dagføra úrslitatænastuna og socialu vangar okkar. Áskoðarar eru vælkomnir at heppa upp á rógvarnar, skrivar Róðrarsambandið.
390 setur eru tilmeldað til Nordic Indoor Championship 2024 – harav eru 57 føroysk.
STARTRØDIN SÆST HER