Fyrrverandi Brøndby-spælarin hevur leitað eftir nýggjum felag, síðan hann og rumenska felagið UTA Arad fóru hvør til sítt.
Men nú er framtíðin hjá 28 ára gamla miðvallaranum komin upp á pláss, tí 07 Vestur kunngjørdi í gjár, at partarnir hava gjørt sáttmála fyri hetta kappingarárið.
Heimasíðan hjá 07 Vestri skrivar, at Frederik Holst hevur nógvar royndir á hægsta stigi, og listin er sera langur:
126 superligadystir fyri Brøndby
92 dystir fyri Elfsborg í bestu svensku deildini
28 dystir fyri Sparta Rotterdam í bestu niðurlendsku deildini
18 dystir fyri Lillestrøm í bestu norsku deildini
15 dystir fyri Helsingborgs IF í bestu svensku deildini
20 dystir í Europa- og Conference League
Í 2012 var Holst einans 17 ár, tá ið hann fekk pláss í byrjanaruppstillingini hjá Brøndby. Tá var hann yngsti spælarin nakrantíð, sum byrjaði ein dyst fyri Brøndby.
Í Brøndby spældi hann nærum hvønn dyst árini 2013-2017.
Holst bleiv sum 16 ára gamal úttikin til danska ungdómslandsliðið, og hevur tilsamans spælt 73 ungdómslandsdystir fyri Danmark, harav 22 U21-dystir.
– Talan er um ein sera aggresivan og hartarbeiðandi spælara. Hann spælir á verjukenda miðvøllinum og kann eisini spæla sum høgri bakkur. Vit gleða okkum at síggja hendan bóltsnillingin á vøllinum í Betri Deildini. Hjartaliga vælkomin, skrivar heimasíðan hjá 07 Vestri.
07 Vestur tapti 0-2 fyri Víkingi í fyrsta dysti í hesum kappingarárinum, og skal til Fuglafjarðar sunnudagin.
Felagsliðið í Vágum endaði á einum fimta plássi farna kappingarár.
