Vøruhúsið hevur stovnað nýggja deild, Vøruhúsið Pro, ið burturav skal selja til vinnuna.
Í hesum sambandi hevur Vøruhúsið sett Kára Hentze sum leiðara fyri nýggju deildina.
– Tíðin er røtt, at vit seta Vøruhúsið Pro á stovn, so vit kunnu røkja vinnukundarnar á besta hátt. Vinnukundar tørva ofta eitt annað slag av ráðgeving enn privatkundar, og tí er tað skilagott at fokusera tilboðini til bæði segmentini, sigur Peter Mouritsen, stjóri í Vøruhúsinum, í tíðindaskrivi.
Vøruhúsið Pro, sum eisini heldur til á Vøruhúsinum á Hjalla, fer at leggja dent á at veita tænastur, sum millum annað fevnir seg um kaffi og reingerðarútgerð til eitt nú skúlar, sjúkrahús, stovnar, gistingarhús, matstovur, kaféir og kantinur.
