Hesa vikuna byrjaði stóra føroyska mentanarátakið, Fog Swept Islands, í New York, har føroysk list, tónleikur, filmar, bókmentir, gastronomi, design og annað verður víst fram í The Big Apple, New York. Mentanarátakið heldur fram til í juli.
Týskvøldið, 9 apríl, skipaði Faroe Music Export (FMX) og Uttanríkis- og vinnumálaráðið fyri móttøku og konsert við Eivøri Pálsdóttir í New York, har Eli Tausen á Lava var gestatónleikari.
Konsertin varð hildin á The Cutting Room á Manhatten. Tiltakið var fyri innbodnum, eitt nú fjølmiðlar og fólk úr tónleikavinnuni í New York. Millum gestirnar vóru m.a. fólk frá Rolling Stone, Variety, Grammy og Spotify.
– Vit sera væl nøgd við tiltakið. Tað er einastandandi at megna at savna týðandi miðlar og fólk frá tónleikavinnuni til eitt føroyskt tónleikatiltak í einum stórbýi sum New York. Hetta gevur FMX og føroyskum tónleiki nógvar møguleikar, sum vit fara at arbeiða víðari við komandi tíðina, sigur Glenn Larsen, leiðari í FMX, í tíðindaskrivi.
Eivør hevði Mikael Black við sær á pall, og Eli Tausen á Lava, sum er klassiskur klaverspælari, hevði saksofonspælaran Jake Miles við sær á pall.
Sì skránna fyri Fog Swept Islands á heimasíðuni hjá Scandinavia House.
Kelda: Uttanríkis- og vinnumálaráðið
