Semingin hjá Semingsstovninum hevur ikki borið á mál, og tí er brennandi spurningurin, um partarnir ikki sjálvir eiga at taka ábyrgd av sáttmálaøkinum og sessast aftur við borðið fyri at finna loysnir, men sambært fakfeløgunum, sum eru í verkfalli, so vóru tað ikki fakfeløgini, sum reistust frá borðinum og endaðu samráðingarnar í gjár, 3. mei.
– Okkara vilji til samráðing hevur allatíðina verið til staðar, og er tað enn. Tað vóru ikki vit, sum góvu skarvin yvir við samráðingarborðið. Tað vóru arbeiðsgevarnir, sum boðsendu semingsmannin, tí teir ikki sóu seg førar at fullføra uppgávuna, siga tey fýra fakfeløgini, ið eru í verkfalli, í felags yvirlýsing.
Fakfeløgini siga, at tey eru altíð til reiðar at sessast við samráðingarborðið, tí tað er har, at slagið skal standa, og tað er har, at semjur skulu finnast.
– Okkara fremsta uppgáva sum fakfelag er at skapa livilig kor fyri verkafólk, og tað stríðast vit á øllum alvi fyri í hesum døgum, og okkara krøv eru púra greið. Tað merkir tó ikki, at vit ikki vilja vísa góða vilja til at finna eina semju við samráðingarborðið, siga feløgini í Samtaki.
