Landsstýrið kann eitt ár frammanundan, at eitt lán fellur til gjaldingar, taka lán til endurfígging. Landsstýrið hevur tann 1. juli tikið eitt 15-ára standandi lán upp á 900 milliónir krónur, sum fellur til gjaldingar 1. juli 2039.
Landsbankin skrivar, at effektiva rentan er 3,624 prosent.
– Hesar 900 mió. kr. vera plaseraðar stutt fram til 2. juni 2025, tá ið lánið upp á 1,645 mia. kr. skal afturrindast.
– Í mai næsta ár verður væntandi aftur ein lántøka framd uppá ta upphædd, sum restar í (745 mió. kr.), umframt ein upphædd til fígging av hallinum á fíggjarlógini í 2023 og 2024, umframt møguliga til gjaldførið, so landskassin heldur ásetingina í lógini um at hava 15 prosent av bruttutjóðarúrtøkuni í gjaldføri.
Umframt hetta lánið upp á 900 mió. kr., so tók landsstýrið eisini í mai í ár eitt lán upp á 1,1 milliardir krónur. Her er talan um eitt fimm-ára standandi lán við eini effektivari rentu upp á 3,258 prosent.
– Upphæddin upp á 1,1 mia. kr. varð brúkt til at rinda aftur eitt lán, sum fall til gjaldingar 3. juni 2024, skrivar Landsbankin.
Les meir í frágreiðing landsbankans um fíggjarliga støðufestið frá mai 2024 her.
