20 ára gamli Rasmus Højlund hevur staðið læknakanningina og verður væntandi kunngjørdur sum nýggjur áleypari hjá Manchester United. Tann danski landsliðsleikarin hevur skrivað ein 5 ára sáttmála við Manchester United. Harafturat er møguleiki at leingja sáttmálan við einum árið, sambært Fabrizio Romano.
Seinastu vikurnar hava verið drúgvar samráðingar millum Manchester United og Atalanta um prísin á Rasmus Højlund. Eina løtu vóru Paris St. Germain eisini við í myndini, men samráðingarnar slitnaðu við Atalanta.
Fyri nøkrum døgum síðani kom endiliga gjøgnumbrot í samráðingunum millum Manchester United og Atalanta. Prísurin fyri Rasmus Højlund ljóðar samanlagt á kr. 625 mió.
Fyri bert hálvum øðrum árið síðani, leikti Rasmus Højlund fyri danska felagið F.C København. Hann leikti samanlagt 32 dystir og skoraði 5 mál dystir fyri FCK, áðrenn hann í veturin 2022, bleiv seldur til SK Sturm Graz í Eysturríki.
Í fjør summar fekk Atalanta eyguni upp fyri tann danska áleyparin og keyptu hann fyri kr. 128 mió. Seinasta kappingarárið hjá Atalanta og Rasmus Højlund eydnaðist væl, tá ið teir endaðu á einum 5. plássið í Serie A.
Rasmus Højlund leikti 34 dystir og skoraði 10 mál fyri felagið í Bergamo. Sama árið fekk hann eisini sín fyrsta landsdyst fyri danska landsliðið, tá ið hann leikti ein hálvan tíma ímóti Kroatia í Nations League. Højlund bleiv ikki úttikin til HM í Katar, men fekk eina frálíka byrjan uppá 2023, tá ið hann skoraði trý mál ímóti Finnlandi.
