Føroyska A-landsliðið var nær við og næstan móti Póllandi hóskvøldið, men tá tað kom til stykkis, gjørdist tað eitt 2-0 tap fyri Lewandowski og Póllandi.
Men tað er stutt millum dystirnar, og longu nú klokkan 17 trínur føroyska manslandsliðið aftur á vøllin, tá Moldova kemur á vitjan á Tórsvølli. Talan er um fjórða undankappingardystin móti moldovum seinastu trý árini, og føroyska úrtøkan hevur verið ein sigur og tveir javnleikir.
Samanborið við teir fyrstu ellivu, ið landsliðsvenjarin, Håkan Ericson sendi á vøllin móti Póllandi farna hósdag, eru fýra broytingar á liðnum til dystin móti Moldova í dag, umframt at leikskipanin verður broytt til 4-4-2, har Klæmint A. Olsen og Jóan Símun Edmundsson báðir byrja frammi í álopinum.
Byrjanarsuppstillingin (4-4-2):
Mattias Lamhauge verður í mál, og í verjuni vera Gilli Sørensen, Odmar Færø, Gunnar Vatnhamar og liðskiparin, Viljormur Davidsen. Á miðvøllinum byrja Jóannes Bjartalíð, Brandur Olsen, Jákup Andreasen og Andrass Johansen, meðan fremstir vera Klæmint Olsen og Jóan Símun Edmundsson.
Á bonkinum frá byrjan vera hesir: Bárður á Reynatrøð, Teitur Gestsson, Sonni Ragnar Nattestad, Sølvi Vatnhamar, Hørður Askham, René Shaki Joensen, Jóannes Kalsø Danielsen, Pætur Petersen, Andrias Edmundsson, Hannes Agnarsson, Stefan Radosavljevic og Ári Mohr Jónsson.
