Tað eru 12 møguligir keyparar, ið hava víst áhuga fyri at keypa Sjódepilin hjá Fiskaaling í Nesvík.
Soleiðis svarar Høgni Hoydal, landsstýrismaður, í svari til Johan Dahl, løgtingsmann fyri Sambandsflokkin.
Víðari skrivar Høgni í svarinum, at í løtuni verður arbeitt við at fáa seinastu formligu viðurskiftini upp á pláss í samband við at fremja søluna.
Harvið vísir landsstýrismaðurin aftur, at landið, ið eigur P/F Fiskaaling, hevur aðrar ætlanir fyri alistøðina í Nesvík.
Sjódepilin hjá P/F Fiskaaling í Nesvík hevði millum annað til endamáls at gera royndir við toski, kalva og øðrum fiskasløgum.
Í viðmerkingunum til fyrispurningin skrivaði Johan Dahl, at “bygningurin stendur við streymasjógv, og tí kann sjógvur pumpast upp til at gera royndir við yngli o.ø. Gjørdar eru stórar íløgur gjøgnum tíðirnar í Sjódepilin í Nesvík, og stór virði standa í løtuni óbrúkt uttan nakra ætlan fyri bygningin. Tí verður hesin fyrispurningur settur”, skrivaði tingmaðurin fyri Sambandsflokkin um miðjan september.