Øll tilbúgvingin varð sett í verk, og sløkkiliðið á Skála var skjótt á staðnum.
Staðfestast kundi skjótt, at talan var um ein lítlan eld, ið gav nógvan royk.
Arbeiðsfólk hjá Mest høvdu arbeitt umborð á grønlendska trolaranum Tasiilaq, sum hevur ligið á Skála í gott og væl tvær vikur, har ymiskt viðlíkahaldsarbeiði hevur verið gjørt, og har var eldur komin í ein leidning, har nógvur roykur stóðst frá.
Eldurin varð sløktur eftir lítlari løtu, og so bleiv frágreiðing skrivað um hendingina.
– Men vit taka altíð tílíkar fráboðanir í størsta álvara, sigur vaktleiðarin á løgreglustøðini.
Grønlendski trolarin Tasiilaq er gamli Christian í Grótinum.
Tað var á sumri í 2020, at eitt grønlendskt felag keypti verksmiðjutrolaran Christian í Grótinum fyri knappar 124 milliónir krónur, og skipið fekk tá navnið Tasiilaq.
Skipið er bygt í 2003, og var heimahoyrandi í Klaksvík frá 2013 til 2020. Tasiilaq er 84 metrar langt og 15 metur breitt.
