Søkt hevur verið eftir fyribils virkandi rektara til Miðnámsskúlanum á Kambsdali fyri Honnu Jensen, ið er í løgtinginum.
Nú umsóknarfreistin er farin – tann 15. oktober – er greitt, at fimm umsóknir eru til starvið.
Tað skrivar Kringvarpið.
Starvið sum virkandi rektari á Miðnámi á Kambsdali verður sett fram til 1.august 2025, men við møguligari leingjan eftir hetta, sum er eitt skúlaár í senn.
Ein setanarnevnd, ið ikki er sett enn, skal viðgera umsóknirnar, skrivar Kringvarpið.
Starvið er flokkað samsvarandi 38. Lønarflokki, sambært Tænastumannafelag Landsins, tó uttan at vera tænastumannastarv. Lønin er í løtuni 58.806,13 krónur um mánaðin umframt 15 prosent í eftirløn.
Á Miðnámi á Kambsdali ganga samanlagt gott 500 næmingar. Skúlin bjóðar út búskaparbreyt, hugbreyt, náttúrubreyt, fyrireikingarbreyt, serbreyt og FHS á Kambsdali og Fyrireikingarbreyt í Klaksvík.
