Skipanin við frítíðarkorti er at finna í fleiri kommunum kring landið.
Í Sunda kommunu hava røddir verið frammi um, at tíðin er búgvin til, at frítíðarkortið í Sunda Kommunu verður sett á komandi fíggjarætlan.
Varaborgarstjórin í Sunda kommunu, Eyðstein Zachariasen, heldur, at ein skipan við frítíðarkorti er neyðug, um Sunda kommuna framhaldandi skal bjóða seg fram til barnafamiljur at seta búgv.
– Frítíðarkortið lættur væl um hjá barnafamiljum, men ikki minst tryggjar tað javnbjóðis tilboð til øll børn í økinum, uttan mun til fíggjarligu raðfestingarnar og umstøðurnar hjá familjunum, heldur varaborgarstjórin.
Minnilutin í trivnaðarnevndini í Sunda kommunu, sum er Eyðstein Zachariasen, hevur tí mælt til at raðfesta frítíðarkortið á fíggjarætlanini fyri 2024. Men meirilutin í trivnaðarnevndini, sum er Trygvi Kallsoy, Rúni Kruse, Vinjard Dam og Haraldur Símunarson Hammer meta ikki, at tað er ráð til at raðfesta frítíðarkortið á fíggjarætlanini 2024, nú ætlanin er at hækka skattaprosentið og barnafrádrátturin í kommununi.
Í uppskotinum frá Eyðsteini Zachariasen verður skotið upp, at børn í kommununi millum 5 og 18 ár skulu fáa ágóðan av einum tílíkum frítíðarkortið, har upphæddin kundi verið umleið 2.000 krónur fyri hvørt barnið. Í kommununi búgva umleið 360 børn, so tað hevði kostað umleið 720.000 krónur um árið, bleiv uppskotið samtykt.
Fíggjarnevndin í kommununi samtykti einmælt tann 23. oktober at mæla býráðnum til at fylgja tilmælinum frá meirilutanum í trivnaðarnevndini – tað vil siga, at ikki raðfesta frítíðarkortið á fíggjarætlanini fyri komandi ár.
Eyðstein Zachariasen virðir avgerðina hjá meirilutanum hjá trivnaðarnevndini, men sigur, at hann fer at arbeiða víðari við ætlanini, so hon vónandi kemur á fíggjarlógina fyri 2025.
Hoyr samrøðu við formannin í trivnaðarnevndini í Sunda kommu, Eyðstein Zachariasen, her:
Hvat er Frítíðarkort?
Frítíðarkortið er ein frítíðarskipan, og sum ánari av kortinum, soleiðis sum uppskotið frá formanninum í trivnaðarnevndini var, fært tú ein ágóða upp til kr. 2.000 fyri hvørt barnið, ið kann nýtast til at rinda fyri lima- og luttøkugjøld í samband við ítróttar- og frítíðarvirksemi.
