Nú verður aftur møguleiki at uppliva hendan leikin har unga kvinnan situr á pallinum og hevur orðið í meira enn ein tíma. Leikhús SKIFT og GUT//productions skipa fyri tveimum sýningum í Løkshøll tann 11. og 12. november báðar dagar klokkan 16.00.
Einsamøll situr kvinnan á pallinum, meðan orðini floyma úr henni. Hon fortelur um, at hon vil hava sukse. Hon vil MEYKA DA. Hon er tilreiðar at gera tað, sum skal til fyri at náa tey mál, hon hevur sett sær og hon trýr uppá, at um hon bara kýtir seg, er djørv og etur eyðmýkingarnar í seg, so skal hon nokk klára tað – MEYKA DA.
Tað er Durita Dahl Andreassen, sum situr á pallinum og tulkar orðini. Leiklistaliga præstatiónin hjá henni verður rópt eitt bragd og millum annað er sagt um leikin:
“Lortið fær fimm stjørnur frá mær”. Høgni Djurhuus, Sosialurin 20.10.2023
“Far! Tit mugu síggja hetta bragdið av einum leiki sum er týddur og leikstjórnaður av Maritu S. Dalsgaard og tulkaður á palli av Duritu D.Andreassen. Nakinleikin, einsemið og konfrontatiónin eru alt partar av einum lýsandi, progressivum samtíðarlistaverk.” Kinna Poulsen, Listaportal.com 13. okt 2023
“Durita Dahl Andreassen má upplivast“. Elisa Vang, facebook 14.10.2023
“Hetta er á heilt ótrúliga høgum støði og ótrúliga stór list” Niels Uni Dam, Vágskálin KvF 18.10.2023
“Tað sterka í leikinum er kroppurin, sum manifestatión og ritual. Ræðandi og innbjóðandi.“
Birgir Kruse, Birkblog.blogspot.com 11.10.2023
“Eg eri faktiskt ordiliga rørd, tí hetta var eitt ramaskríggj frá einari ungari kvinnu, sum eg haldi faktiskt, at eg kenni meg aftur í” Gunnvá Zachariasen, Vágskálin KvF 18.10.2023
“Eg bleiv still. Og fyrst og fremst var tað ein framúrskarðandi prestatión” Gulla Øregaard, Vágskálin KvF 18.10.2023
