Hevur tú gjørt ein nýggjan og góðan stuttfilm? So er bara at lesa víðari, tí 9. februar verður stuttfilmskappingin, Geytin, aftur í Norðurlandahúsinum – kappingin, har nýggir føroyskir stuttfilmar verða sýndir og heiðraðir.
Um tú hevur gjørt ein stuttfilm, sum tú kundi hugsað tær at havt við í kappingini, skalt tú melda filmin inn í seinasta lagi 8. januar, áðrenn midnátt.
Tú meldar stuttfilmin inn við at senda eini boð til film@nlh.fo við hesum upplýsingum:
• Heiti og longd á filmi
• Slag av filmi, umframt nær/hvar hann seinast varð sýndur alment (um nakrantíð)
• Synopsis
• Navn á leikstjóra
• Teldupostadressu og telefonnummar hjá kontaktpersóni
Fleiri upplýsingar um, hvussu tú meldar til og um krøvini til filmin eru at finna á nlh.fo
Ein yrkisnevnd metir tilmeldaðu filmarnar eftir hesum virðum: søgu, søgusnildi og handverk. Nevndin tilskilar sær rætt at gera eitt úrval av tilmeldaðu filmunum, og avgerðin er endalig.
Um tín filmur verður valdur til Geytan, fært tú boð um hetta í seinasta lagi 17. januar 2024, har tú fært stutta freist at lata filmin inn aftur í røttum formati og við undirteksti.
Eru spurningar ella ivamál, eru tit vælkomin at seta tykkum í samband við okkum á film@nlh.fo