Í sendingini “Góðan morgun, Føroyum” í morgun var ársins orð kunngjørt.
Ársins orð 2023 er “vitlíki”.
Tað vóru tíggju orð, ið vóru í uppskoti at gerast ársins orð.
Hesi vóru:
- avgjald
- fótfjøtur
- gongugjald
- havnarstongsul
- heimloysi
- ja takk-tilboð
- lønarlyft
- tingkvinna
- tøkugjald
- vitlíki
Ársins orð bleiv “vitlíki”, sum er føroyska orðið fyri AI, artificial intelligence.
Í dómsnevndini sita Lena Reinert, limur í Málráðnum, Jón Brian Hvidtfeldt, formaður í felagnum Føroysk Miðlafólk, og Jastrid á Dalbø, næstforkvinna í felagnum Føroyamál.
Jón Brian Hvidtfeldt helt, at havnarstongsul skuldi vera ársins orð, meðan Jastrid á Dalbø peikaði á vitlíki.
Tískil var tað Lena Reinert, ið átti avgerðandi atkvøðuna, og hon peikaði eisini á vitlíki.
Hesi eru ársins orð seinastu átta árini:
2016: hjúnabandslóg
2017: fiskivinnunýskipan
2018: ræstkjøtaburgari
2019: heimafriður
2020: sóttarhald
2021: sammóðir
2022: stuttflutt
2023: vitlíki
Fyri viku síðan var ársins orð valt í Danmark, og tað bleiv “ChatGPT”
Í Norra er ársins orð: KI-generet, sum merkir nøkulunda “gjørt við vitlíki”.
Í Onglandi er ársins orð “Rizz”, ið er ein stytting fyri “charisma”.
Til stuttleika kann nevnast, at orðið “rizz” er í uppskoti at gerast ársins ungdómsorð í Danmark.
Kelda: Kringvarp Føroya