Flokkarnir hjá fólkatingslimunum úr Grønlandi og Føroyum fáa nú 67.000 krónur um mánaðin til tulk og umseting.
Hetta verður gjørt, so fólkatingfólkini kunnu tosa grønlendskt og føroyskt í fólkatinginum.
Tað, sum ikki verður brúkt til hesa tænastuna, skal latast fólkatinginum aftur.
Sambandsflokkurin á Fólkatingi sigur í dag, at flokkurin fer ikki at brúka hesa tulkatænastuna.
– Fyri einki ivamál skal vera, so skal eg gera greitt, at Sambandsflokkurin á Fólkatingi fer ikki at brúka skipanina hjá Fólkatinginum um at fáa pening til tulk, sigur Anna Falkenberg, fólkatingskvinna fyri Sambandsflokkin, í tíðindaskrivi.
Flokkarnir á fólkatingi kunnu søkja um peningin, um tørvur er á tí, men tað verður tað ikki í hesum føri hjá Onnu Falkenberg.
– Eg havi ikki brúk fyri hasi skipanini, sum støðan er nú, tí eg fari framhaldandi at tosa danskt í Fólkatingssalinum. Er tað tørvur á onkrari umseting í sambandi við fólkatingsarbeiðið, so verður tað avgreitt undir verandi skipan við floksstuðli, sigur Anna Falkenberg.