Í gjár fekk Føroya Politi tvær fráboðanir um hendingar, ið eru hend um høgtíðina.
Talan er innbrot umframt at onkur hevur sett hol á dekk.
Tá fólk komu til arbeiðis í einari skrivstovu í miðbýnum í Havn eftir jólahøgtíðina, so løgdu tey til merkis, at onkur hevði brotið eitt vindeyga umframt tvær hurðar í bygninginum.
– At síggja til er einki stolið í skrivstovuni, men talan er helst um onkran, sum hevur leitað sær skjól har, hóast eingi sjónlig tekin eru um tað, greiðir vaktleiðarin hjá Føroya Politi frá.
Hol á tvey dekk
Eisini fekk løgreglan eina fráboðan í gjár um, at onkur hevur sett hol á dekk á tveimum persónbilum, ið stóðu við eini sethús í Havn.
Bilarnir hoyra til hetta privata heimi, og hendingin er farin fram í einum av jóladøgunum og til í gjár.
