Sverri Sandberg Nielsen og føroyalitti einskullarin skulu aftur umboða Danmark á olympiuleikunum, sum hesa ferð er í París í summar.
Miðvís venjing og venjingarlegur standa fyri framman, og í næstum gongur leiðin til fyrstu venjingarleguna í Aviz, Portugal.
– Sverri Sandberg Nielsen hevur longu víst í verki, at tað ber til at røkka málum við dirvi, megi og vilja, men Sverri hevur tørv á øllum stuðli; bæði fíggjarliga og ítróttaliga. Tað er í hesum sambandi, at Sverri og Føroya Tele hevur skrivað undir nýggja stuðulsavtalu fyri 2024, skrivar Føroya Tele í tíðindaskrivi.
Tað var annars í 2021, at Sverri og Føroya Tele fyrstu ferð tóku lógvatak saman, og tað rann saman millum partarnar. Sostatt verður nú farið undir fjórða árið, har ið stórur dentur verður lagdur á gott og gevandi samstarv.
Stuðulsavtalan er galdandi fyri 2024, og við avtaluni er Føroya Tele einsamallur høvuðsstuðul hjá Sverra.
