Hann segði frá nógvum kava í gjárkvøldið og í nátt, men hóast tað, so vóru tað summi, ið treiskaðust móti kavanum og fóru út at koyra, og tað hevði millum annað við sær, at ein bilur koyrdi seg fastan í kavanum á landsvegnum omanfyri Kvívík.
Hetta var beint fyri midnátt í gjárkvøldið, at løgreglan fekk boðini.
Bilurin koyrdi úr Vestmanna, og var á veg til Havnar, tá kavin steðgaði bilinum omanfyri Kvívík.
Átaksleiðarin á staðnum var bleytur um hjarta, tá hann kom bilføraranum – einari kvinnu – til hjálpar, at hann avgjørdi at koyra kvinnuna til Havnar.
Í morgun visti Landsverk at siga, at bert tað eina sporið er opið á Vestmannavegnum tíðliga í morgun.
Landsverk sigur, at tað er hált og glerstoytt er í støðum kring landið.
Koyrandi er ikki Fámjins, Akrar og ei heldr til Skælings í løtuni.
Landsverk mælir fólki til at koyra varliga.
Bingja koppaði við Margáir
Tað hevur eisini verið nakað av vindi í gjárkvøldið og í nátt, og tað hevði við sær, at ein bingja, sum stóð við fótbóltsvøllin við Margári, koppaði í gjárkvøldið.
Vaktleiðarin visti í morgun ikki at siga, hvat fyri skaði stóðst av hesum.
Í nátt bleiv eisini eitt ferðsluóhapp fráboðað í Klaksvík. Ein maður koyrdi onkursvegna á ein annan parkeraðan bil á Gerðavegnum.
Báðir bilarnir fóru so mikið illa, at løgreglan avgjørdi at taka pláturnar av báðum bilum. Eingin fólkaskaði stóðst av soloóhappinum.
Løgreglan hevur ongan illgruna um rúsdrekka í samband við óhappið.
