Tað skuldi vísa seg at verða ein rímiliga javnur dystur, hóast Dráttur var omaná tað mesta av tíðini.
Mjølnir kvinnurnar eru uttan lyklaleikaran Sirið Hanusardóttir Samson, og var tað nevniliga á hennara plássið, at flestu avgerandi bóltarnir manglaðu. Endurtakandi ferðir vóru servurnar ov langar – og í staðin fyri at fáa stig, varð stig serverað til mótstøðuliðið.
Nógvar ungar kvinnur eru slopnar framat í Mjølnir. Hesar stóðu seg eisini væl í dag, men tað rakk tíverri fyri Mjølnir, ikki á mál. Tað er vanligt við útlenskum, keyptum leikarum, men soleiðis er ikki í Mjølnir kvinnum.
– Teresa (Dráttur) vinnur øgiliga nógvar bóltar og kanska er tað munurin, sigur Amanda Niclassen, liðskipari hjá Mjølni, í samrøðu við Televarpið.
Settini endaðu 25-18, 25-20 og 26-24 til Drátt.
Mjølnir kann nú seta sjóneykuna á at klára landskappingina so gott sum til ber, nú kvinnuliðið ikki er við í steypakappingini.
Badmintonhøllin í Klaksvík er karmur um hálvfinalurnar. Í skrivandi løtu verður gjørt klárt til fyrstu hálvfinaluna hjá monnum, ið verður millum SÍ og ÍF.
