Byggi- og býarskipanarnevndin hevði málið til viðgerðar 12. februar 2024. Atkvøtt varð um málið tá, og Tróndur Sigurðsson og Kári Johansen atkvøddu blankt, Súsanna Olsen atkvøddi ímóti, men Annfinn Brekkstein og Jákup Dam tóku undir við tilmælinum. Jákup Dam kravdi málið fyri býráðið.
Heimasíðan hjá Tórshavnar kommunu skrivar, at tilmælið frá tekniska stjóranum og leiðaranum á byggimálsdeildini til í kvøld var at staðfesta avgerðina um at skriva út byggiloyvi við treytum um, at økið uttan um kirkjuna verður endurskapað, soleiðis sum tekningarnar, sum liggja við umsóknini um byggiloyvi, vísa, og annars við treytum sum umsitingin setur.
– Á býráðsfundi í dag legði borgarstjórin fram broytingaruppskot, har mælt verður til at taka undir við byggi- og býarskipanarnevndini við teirri broyting, at veitt verður kirkjuráðnum á Argjum byggiloyvi til nýggjan kirkjubygning treytað av, at farið verður ikki undir jørðarbeiðið, fyrrenn ein fullfíggjað kostnaðar-, tíðar- og byggiætlan fyriliggur fyri allari byggingini, skrivar kommunan.
Hetta varð samtykt við átta atkvøðum fyri og fimm ímóti.
